Segun diputado James Kroon, e siman di trabou na Hulanda tabata hopi intensivo i a produsí hopi akuerdonan positivo pa Boneiru. Entre otro riba tereno di infrastruktura e por menshoná ku e desaroyo na aeropuerto Flamingo a keda akordá, pa loke ta su segundo fase. E segundo fase aki ta e taxiebaan i e plataforma unda e avionnan tin ku stashoná. Sinembargo Boneiru a supliká Hulanda pa laga kaba ku e terser fase promé, pa asina implementá e dos fasenan aki huntu. E terser fase ta regardá e edifisio di aeropuerto Flamingo.
Segun diputado Kroon, ta konosí ku promé ku sigui desaroyá aeropuerto mester krea mas espasio pa pasaheronan ku ta yega Boneiru. Esaki netamente tabata e motibu tambe pa a pidi Hulanda pa inkorporá e dos fasenan aki huntu.
E otro parti di infrastruktura ku a haña basta atenshon na Hulanda ta e kareteranan di Boneiru. Segun diputado Kroon nan a yega na pensamentunan konkreto ku nan tin ku kaba atendé den dianan ku ta bini, pa asina yega na un sistema kon Hulanda huntu ku Boneiru ta bai hasi henter e parti di infrastruktura aki. El a mustra ku ya tin pensamentunan kaba dilanti.
E diputado a mustra ku ta e intenshon di Hulanda pa bai yuda Boneiru ku esaki, pero no abase di e rapòrt so ku tin riba mesa aktualmente, pero tin mas faktornan ku ta bai bini aserka pa yega na un plan amplio pa asina Boneiru huntu ku Hulanda atendé e kareteranan.
Pa loke ta trata kaminda e kasnan pa pueblo ta bai bini, huntu ku e entidat Hulandes nan ta bai akordá drechamentu di e área aki, manera entre otro e tereno di bala di Less Indian i tambe esun di La Sonrisa. E diputado tambe a hasi remarke riba e forma kon e diferente ministerionan a traha huntu ku e delegashon di BES. Klaramente por a mira, segun e diputado, ku Boneiru ta parti di Hulanda. No tabatin kuestion pa wak ta for di kua ‘potje’ ta bai saka pa atendé e asuntunan di Boneiru, pero den un forma di rèspèt mutuo a atendé tur e loke e delegashon a bai pa atendé.
Finalisando diputado Kroon a mustra ku tabata un siman di hopi trabou, pero na final a keda sumamente satisfecho, pasobra tabatin resultado kaminda hopi tópikonan ku tabata riba mesa a risibí atenshon.
