Den su deklarashon na prensa, e presidente di UPB ing. Reginald “Yonchi” Dortalina a sigui mustra ku den e kaso aki gobièrnu i e diputado el Hage ta mustra kon un gobernashon serio mester funshoná. En bes di trata na demonisá e diputado i su gobièrnu, nos mester ta kontentu i agradesido ku e diputado aki i su gobièrnu ta hasi nan trabou manera mester ta i ku nan no tin miedu di atendé problemanan serio ku presentá. Nan ta atendé ku seriedat i no ta manipulá ni trata na tira santu den wowo di pueblo.
“E bèrdat ta riba mesa kaminda tur hende por mira ku pa weganan polítiko di Beukenboom di Dirks, awe WEB tin ku pasa den pèrtá i ku konsekuensia ku awa i koriente por bai subi, si no yega na solushon berdadero i duradero pa e problema aki.
Sindikatonan Uni en bes di a sali ku deklarashonnan polítiko sin kontenido, mester a aserká gobièrnu promé pa sinta na mesa pa komprondé promé ta kiko ta e problema i si ta posibel yuda buska solushon en bes di trata na krea broyo innesesario. Si akaso ta oposishon polítiko Sindikatonan Uni kier bai hiba, nan mester deklará nan mes komo un partido polítiko i no skonde tras di sindikato. Sindikatonan Uní no mester bira Oposishon Uní. Si kier pone esnan ku ta responsabel pa e problema ku a surgi na WEB responsabel, nan mester kuminsá na denunsiá esnan ku a konsehá pa no paga ECO-power.
Simplemente kore tras di deklarashon di e machavellonan Giskus i Willem, no ta yuda e kousa pa tin sindikatonan uní riba nos isla. E problema di e 10 mion ku WEB mester paga no tin nada di aber ku e direkshon ku gobièrnu a tuma pa yega energia bèrdè riba nos isla. No mester konfundí pueblo ku informashonnan inkorekto. E situashon ku tin na momentu aki ta pa motibu di resultado di arbitrahe, pues e fakturanan i konflikto kaminda WEB no kier a paga ECOPOWER i ku gobièrnu di e tempu ei (Beukenboom i Dirks) a sostené, ta pone ku tin ku paga e 10 mion dòler di debe ku nan a krea. Pa por hasi esaki, nos mester subi tarifa pa sigur sinku aña ku alrededor di 50% pa por paga e 10 mion aki bèk. Pues e problema ta basá riba e echo ku WEB a nenga di paga ECO-power i nada mas. Esnan ku a konsehá pa WEB keda sin paga ta Beukenboom, Dirks i otronan ku awe ta grita na boka grandi ku mester sera o pone esnan responsabel pa e debákle aki responsabel pa kabes, sin sa ku ta nan mes ta responsabel na promé lugá pa e debákle di WEB. Den lei Hulandes nan tur ta hoofdelijk aansprakelijk. Tantu esnan ku a tuma e desishonnan robes komo esnan ku a sostené e desishon.” Asina ing. Reginald Dortalina, presidente di UPB a deklará na prensa.
