Hopi biaha sa sosodé ku trabounan ku tabatin tempu pa por a hasi nan, ta spera riba e último momentu pa nan wòrdu ehersé. E fin siman tras di lomba aki, e último fin siman promé ku skolnan habri nan porta, por a tuma nota di diferente trabounan ku ta wòrdu ehersé den área di skolnan. Siendo tabatin mas ku luna di fakansi ku e trabounan por a wòrdu hasi.
Un di esakinan ku sigur ta òf por bira un opstákulo pa mayornan i alumnonan ku ta bai e skol nobo Liseo Boneriano, ta e preparashon di e karetera ku ta kondusí for di Kaya Amsterdam pa e skol. E skol ya a ópera gran parti di e aña eskolar anterior i esnan ku tabata bai e skol aki, sa kon e karetera di tera aki tabata. No papia mes ku mester tabatin yobida.
Nos a kaba di mas ku luna di fakansi, unda no tabatin tráfiko riba e karetera aki. Pero no a laga drecha e karetera. Tabata e fin siman aki ku a tuma nota ku un kompania a pone un flur di asfaltá pa próksimamente asfaltá e karetera aki. Pa kolmo de los kolmo, djadumingu ku kisas e kompania a kere di lo a terminá su trabou, Boneiru a lanta basta nubla i ku algu di áwaseru. E pregunta ta, pakiko a warda te na último ora pa drecha esaki?
