Asosashon di Hotèl i Turismo di Boneiru, BONHATA, a publiká sifra di okupashon pa promé i segundo kwartal di 2012. E numbernan preliminario ta mustra un okupashon di 65.62 % pa e periodo aki kompará ku 64.09% den 2011. Esaki ta un oumento modesto den promé kwartal i marginal den segundo kwartal, 1.53% i 0.51% respektivamente. Boneiru a keda atrás den kresementu kompará ku region di Karibe den e mesun periodo. E resultadonan pa e segundo kwartal na 2012 ta signifikantemente mas abou na 0.51% kompará ku 2.65% na 2011.
Konosedónan di industria ta komparti ku e pronostiko pa e siguiente lunanan ta ekstremadamente abou, ainda ora tuma den konsiderashon e echo ku awendia biaheronan ta boek nan vakantie mas laat. E miedo ta ku e temporada na kaminda lo ta uno historikamente abou. E industria hotelero klaramente ainda ta lucha ku tarifanan diario ku ta mucho abou, bishitantenan ku ta gasta menos i kostonan mas haltu di operashon , gran parti di esaki ta e resultado di okupashon abou di hotèlnan, oumento drastiko den belasting i kosto di produktonan. Ademas, ora e sektor di hotel/resort ta lucha pa sobrevivi, e resto di e sector priva, entre otro kompanianan ku ta huur auto, restaurantnan, proveëdornan di produkto, kompanianan di tour, real estate, supermerkadonan i otronan lo sinti, of a sinti kaba, e efektonan di e redukshon. Turismo ta aportá 80% di aktividat ekonómiko di Boneiru. Esaki tambe lo tin influensia negativo riba potenshal invershonistanan ekstranhero riba nos isla.
Pa doñonan di compania i Bonieru manera un destinashon, por promove nos produktonan nos tur mester kolektá datonan. Pa akomodashonnan ta importante pa tin akseso na sifranan di okupashon, pero tambe na sifranan di omzet ya ku ta solamente ku dato konkreto por yega na un benchmark of punto di referencia, riba kual por funda desishonan. Turismo ta e pilar di ekonomia di Boneiru, BONHATA ta enkurashá tur akomodashonnan pa kolektá i komparti e datonan nesesario pa por kompará nan mes ku e isla, i e region di Karibe i mas leu. BONHATA a risibí informashon di okupashon di 12 propiedat (incluiendo propiedatnan ku no ta miembro di BONHATA), tambe a risibí sifranan di omzet di algun di e propiedatnan aki. BONHATA ta spera di risibí mas sifra di omzet den e siguiente simannan. E informashon aki ta nesesario pa kompleta e storia na un manera ku sifranan di okupashon so no por hasi. Si bo kier mas informashon of kier sa kon pa kontribuí, favor tuma kontakto ku ofisina di BONHATA.
BONHATA ta wordu rekonosí dor di gobiernu i Caribbean Hotel & Tourism Association (CHTA-Asosashon di Hotèl i Tursimo di Karibe) komo e asosashon ofisial di Hotel i Tursimo di Boneiru. Fundá na 1980, e ta na kabes di industria turistiko di Boneiru pa mas ku tres dekada kaba. E asosashon, ku mas ku 80 miembro, tin komo su mision statement: “Promové, apoyá i stimulá nos miembronan dor di koperashon ku un bos unifiká”.
