Hopi biaha ta tuma nota kon bishitantenan òf tambe pasaheronan ke hasi un komunikashon telefóniko na aeropuerto Flamingo, pero no tin e disponibilidat aki di servisio na públiko. Bèrdat ta ku tin un servisio pa hasi yamadanan internashonal na aeropuerto ku ta usa tarheta di krédito i tambe a instalá dos telefon banda di un pilar di e edifisio. Esakinan probablemente lo mester a bira telefonnan públiko ku tambe lo por a usa tantu tarheta komo moneda (coins).
Pero pa un motibu ku nunka a keda splika, nunka esakinan no a funshoná i no ta funshoná tampoko. Ta telefonnan ku den nan estilo ta aki na Boneiru so nos a tuma nota di dje, pero ku aparentemente no por a pone nan den servisio i nan a keda komo souvenier na banda di e pilar di prònk.
Hopi biaha ta taksistanan ta ousiliá tantu esnan lokal òf otro bishitantenan ku ta haña nan mes oblig’é di hasi un komunikashon, pa brinda nan selular personal òf hasi yamada (lokal) pa nan. Ta yega tempu pa si tin telefon na aeropuerto Flamingo, pa di bèrdat ta algu ku por wòrdu usa i no pa prònk.
Riba e potrèt por mira dos telefon na un pilar na aeropuerto, ku nunka a funshoná i tin mas di aña instalá na e sitio.
