Djaluna den ora di anochi a yega Boneiru for di Republika Dominikana e dos digno representantenan Miosotis Mata i Edi-Sharey Antonia. Un grupo grandi amigu, famia i miembronan di A.D. Produkshon a bai yama e dos hobennan aki un bonbini i alaves felisita nan ku nan logro den e kompetensia di Mini & Miss Teen Model International 2012. Edi-sharey Antonia a keda eligi komo 3 finalista Mini Model International 2012 i Miosotis Mata a sali Miss Teen Elegancia International 2012.
A.D. Produkshon ta sumamente orguyoso ku nan dos representantenan ku a saka kara di Boneiru i a regresa ku premio. Meta di e A.D. Produkshon ta un bon partisipashon i representa Boneiru riba un nivel haltu.
Un gradisimentu di kurason A.D. Produkshon ta ekstende na un i tur ku a kopera ku e hobennan aki ku nan biahe i nan soño por a wordu kristalisa. Tambe na nan mayornan ku a kere den e organisashon. Danki ta bai na Angelo Emerenciana ku a representa A.D. Produkshon den su totalidat i Jessy Frans Rosario estalista di A.D. Produkshon ku a biaha ku e hobennan aki.
Awor ta keda pendiente pa e siguiente sinku otro representantenan di Boneiru ku ta bai kompeti pa e sertamen di Miss & Mister Tourism Intercontinental 2012. Nan lo biaha dia 24 di yuli pa 30 di yuli pa Republika Dominikana.
