Siman pasa djasabra, diputado James Kroon i sr. Hans Els komo representante di diputado sra. Silvana Serfilia a hasi un bishita di kortesia serka e grandinan di Grupo 60 plùs Flor di Orkidia na e Sentro Profesor Alejandro Saleh na Nort Saliña pa selebrá alabes eligí mama i tata di e grupo 60 plùs. Ta un kustumber ku tur aña e grupo aki ta selebrá dia di tata i mama n’e mes momentu despues di e dia original di mama i tata. I komo tal ta eligí tambe un mama i un tata pa e aña koriente. Komo mama di aña a resultá sra. Mercedes (Chechi) Soleano i e tata di aña a resultá sr. Richard Heileger.
Despues di a eligí mama i tata miembronan a sigui fiesta riba ritmo di Grupo Típiko Flor di Orkidia kaminda a selebrá tambe kumpleaño di un di e miembronan di promé ora i alabes lider i tokadó di e típiko ku ta sr. Shon Bubu Thielman kende a kumpli un edat basta respetá i te ainda ta super aktivo tokando den Típiko Flor di Orkidia. Despues ku a kanta happy birthday pa Shon Bubu a kòrta bolo i selebrá te den oranan lat di anochi kaminda un i tur presente a gosa na nan manera.
Riba e potrètnan por mira momentunan ku diputado James Kroon i Hans Els representando diputado Silvana Serfilia huntu e ku mama i tata di Grupo 60 Plùs Flor di Orkidia i Ires Semeler presidente di e grupo na Sentro Profesor Alejandro Saleh.
