Djadumingu pa promé bia gobièrnu di Boneiru pa medio Direktorado di Kuido Komunidat huntu ku Indebon a organisá un asina yamá “CICLOVIA” kaminda pueblo di Boneiru/turista por hasi uso di Kaya J.N.E. Craane pa kana liber i hasi deporte asina yuda tene kurpa 
sano i alabes den kondishon. Esaki ta pa medio di un Ordenansa di lei ku a keda akordá den un reunion di Kolegio Ehekutivo fecha 6 di yüni 2012.
Den e kuadro aki diputado James Kroon a hasi apertura ofisial kaminda e 
mainta a kuminsá ku Zumba den Parke Wilhelmina, sigui pa despues aktividat den e parke organisá pa Fesbo, por a hisa peso tambe serka e profeshonal den bodybuilding sr. Alison Maria ku a bin ku algun ekipo di su djim. Miéntras ku tabatin waterpolo i bich vòlibòl na parke na Playa Pabou, por a hasi usu di Malekon pa hasi ehersisio, kore baiskel djòg i asta tabatin un pista chikí kaminda hóbennan por a hasi kenshi ku nan crossbike etc, komo ku a sera pa tráfiko motorisá na Kaya J.N.E. Craane for di Playa Lechi ta na Duana.
Intenshon di gobièrnu ta pa tene un CICLOVIA kada salta luna i e próksimo ta tuma lugá dia 12 di ougùstùs próksimo. E promé CICLOVIA tabata un éksito i diputado Kroon kier a felisitá i yama danki na tur e servisionan ku a traha riba e proyekto i alabes ta hasi un supliká pa hasi bon uso di e oportunidat ku gobièrnu ta brinda pa tene e kurpa den kondishon. Hasiendo deporte ta tene mente i kurpa sano.
