Djaluna 18 di yüni, e Asosashon di Hotel i Turismo, BONHATA tabata presente na Divi Flamingo Beach Resort & Casino pa selebrá e resort su 60 aña den hospitalidat. Na 1952 e hotèl a wòrdu habri dor di L.D. Gerharts komo Boneiru su promé hotèl. Originalmente konosí bou nòmber di Hotèl Zeebad, e 
nòmber a kambia pa Flamingo Beach Hotel promé ku a forma parti di Divi Group na 1975. Divi Flamingo ta un di e kompanianan fundador di BONHATA i te awendia ta un di e miembronan mas aktivo i respetá dentro di e organisashon. Hugo Gerharts, miembro honorario di BONHATA i un di nos fundadónan, tabata presente pa papia na nòmber di su tata L.D. riba e okashon aki.
Pa selebrá e gran logro aki, Divi Flamingo Beach Resort & Casino a organisá un serie di evento i aktividat pa honrá e leyendanan di pasado. BONHATA ta kier a felisitá e resort ku e logro bunita aki, e hotèl ta un monumento pa vishon pionero i ta keda un di e pilarnan di industria di turismo na Boneiru. Pa marka e okashon festivo aki sra. Anja Romeijnders, presidente di direktiva di BONHATA a otorgá un sertifikado konmemorativo na sra. Sara Matera, General Manager di e hotèl.
BONHATA ta wòrdu rekonosé dor di gobièrnu i Caribbean Hotel & Tourism Association (CHTA-Asosashon di Hotèl i Turismo di Karibe) komo e asosashon ofisial di Hotèl i Turismo di Boneiru. Fundá na 1980, e ta na kabes di industria turístiko di Boneiru pa mas ku tres dékada kaba. E asosashon, ku mas ku 80 miembro, tin komo su mishon statement: “Promové, apoyá i stimulá nos miembronan dor di koperashon ku un bos unifiká”.
