Pa algun tempu kaba segun por a tende di diputado Burney el Hage atraves di Digital FM, turismo di Boneiru ta para ketu. E instituto pa un tempu kaba ta pasando den un proseso di kambio i no por deskartá ku den e proseso di kambio aki vroom-vroom nan ta lanta i ku bou di e maneho lo tin interogatorio ku akshonistanan tin ku deal kuné. Den e kaso aki ta Bonaire Holding Maatschappij (BHM) i e hunta di komisario ku tin sinta ei nan i den pasado e otro hunta di komisario ku tabatin den puesto ei. Asina e diputado enkargá ku ekonomia Burney el Hage a trese dilanti.
El a sigui bisa, ku TCB ta hopi importante pa e ekonomia di Boneiru. Kualke kos ku pasa ei nan, mester ta algu temporal ku nan mester por keda atendé profeshonalmente i stabilisá e operashon pa move den turismo, pasobra ta loke Boneiru tin mester di dje.
E diputado ta haña ku Boneiru ta para ketu pa basta tempu kaba riba e tereno di turismo. Ta algu ku sigur e no a kustumbrá kuné den turismo di Boneiru, pasobra semper Boneiru sa keda inová i bini ku ideanan nobo pa merkadeá Boneiru. Personalmente e diputado ta sinti falta di un siklo nobo di imágen di Boneiru i un siklo nobo pa pone Boneiru bek den mente di e turistanan ku ke bini Boneiru. P’esei e ta haña ku mester move lihé den e problemátiko den TCB pa pone kosnan bek na unda Boneiru a kustumbrá kuné.
Gobièrnu ke pa bini moveshon bek den turismo di Boneiru manera mester ta. E imágen di Boneiru mester di un ‘face lift’. Boneiru mester ta den mente di esun ku ta bini Boneiru i ku kosnan inovativo. Boneiru semper bai tabata hunga un ròl grandi den asuntunan di buseo i sa bini ku ideanan nobo kon tabata promové un destinashon komo Boneiru. I Boneiru den mundu di merkadeo den Caribe semper sa kore dilanti di su inventonan di manera mas barata posibel, promové e isla di Boneiru. Pues no ta permití pa keda tantu tempu asina sin laga afó sa di Boneiru. I esaki ta loke e organisashon tin ku sòru pe tuma lugá.
I si den e kaso aki, hunta di komisario i e direktora no ta sali for di dje, nan tin ku yega na un konklushon huntu ku otro. E diputado su konseho ta, pa mantené nan mes na profeshonalismo i atendé profeshonalmente ku otro i si nan tin ku yega na desishon, sea pa kual sea e desishon (por ta terminashon di akuerdo) hasi esaki abase profeshonal i sigui move, pa produsí un mihó produkto turístiko pa e ekonomia di Boneiru.
