E departamentu di Maneho di Desaster di British Virgin Islands (BVI) ta na Boneiru pa duna un training pa Maneho di Alohamentu den situashon di krísis òf emergensia). Ta trata aki señora. Sharleen Da Breo i señor Ronnie Lettsome, durante tres dia lo duna informashon na partner nan envolví momentu ku Boneiru konfrontá kualke eventualidat ( kalamidat aki na Boneiru).
Na komienso di e training aki tabata presente sekretario general di gobièrnu di Boneiru Mr. Nerry Gonzalez ku a duna palabranan di bon bini na e dos personanan ku a duna e training pa Maneho di Shèlter, a deseá e instansia nan envolví éksito ku e treinen aki komo ku ta di sumo importansia pa Boneiru por tin personanan prepará na momentu ku por surgi kualke krísis òf kalamidat na Boneiru i ku tin instansianan ku por aktua i sa kiko tin ku hasi.
E material pa e Training di Maneho di Shèlter a keda desaroyá pa e agensia Internashonal di Merka pa Ofisina pa duna asistensha den Maneho di Desaster na paisnan stranhero. Den prinsipio di dékada 90 di siglo pasá e training a keda ofresé pa promé biaha den área di Caribe. For di e tempu ei, e organisashonan manera e departamentu di Maneho di Desaster di Islanan Bírgen Ingles a prepará personanan i a desaroyá programanan pa maneho di Shèlter di Emergensha. E training a enfoká riba funshonario nan di maneho di desaster i di shelter, tambe boluntario nan ku ke duna nan tempu i servisio na un Shèlter di Emergensha durante tempu di riesgo di impakto.
E meta prinsipal di e training pa Maneho di Shèlter ta pa proveé individualnan ku e informashon nesesario ku ta outorisá nan pa kontribuí na selekshon, preparashon, mantenshon i operashon di Shèlternan di Emergensha. E trainernan ta na enkargo di sra. Sharleen DaBreo, di e departamentu di Desaster di BVI ku asistensia di sr. Ronnie Lettsome. Na e training ta partisipá 30 persona for di diferente instansia i organisashon di Boneiru.
Durante di e kurso di 3 dia e instruktornan lo identifiká partisipantenan ku tin e abilidat pa sirbi komo instruktor outorisá pa duna e training lokalmente i tambe duna sosten na empeñonan pa desaroyá un Programa di Maneho di Shèlter Nashonal.
E training ta sostené pa OCT su Inisiativa di Redukshon di Riesgo (R3i) ku ta kubri e paisnan Ingles i Hulandes i teritorionan den e region, un total di 7 teritorio (Anguilla, Aruba, BVI, Cayman Islands, Montserrrat, Turks & Caicos i e islanan ku tabata forma Antia Hulandes (Boneiru, Kòrsou, San Martin, Saba i Statia). E proyekto aki ta trata na redusí e riesgo i eksposishon di e islanan chikitu aki dor di perkurá pa un kadena regional di fasilidat, programanan, maneho i protokòl pa hasi nan kapasidat mas fuerte pa por pronostiká i prepará pa riesgonan i asina mehorá elastisidat i redusí riesgo i seguidamente pèrdida. R3i ta fundá pa Komishon Europeo ku kasi € 5 mion kubriendo un periodo di 4 aña i ku lo konkluí na desèmber 2012.
Potrètnan ta ilustrá momentu ku sra. Gonzalez ta duna palabranan na inisio di maneho di desaster i e partisipantenan i e instruktornan di British Virgin Islands (BVI) i representante di diferente instansia di Boneiru ku a partisipá intensivamente na e training.
