Mediante un korant informativo e kompania MNO-Vervat i gobièrnu di Boneiru ta duna informashon riba e proyekto di kloaka ku tabatin e suidadanonan di e isla aki tòg basta molèster. Kamindanan será i kibrá; esei hopi hende a ripará.
Boneiru ta traha kloaka den Playa i a lo largu di kosta. I esei ta okashoná molèster. Temporalmente, pasobra fin di e aña akí tur kos ta tras di lomba. Gobièrnu di Boneiru i e kontratista MNO Vervat ta pidi bo komprenshon i koperashon pa e trabounan akí ku ta nesesario. Den e korant akí di informashon pa siudadano i empresario, bo por lesa mas tokante esakinan.
“Pakiko e trabounan
Boneiru ta traha na solushon di un problema. Awa di berpùt ta dañino pa nos salú i pa salú di e refnan di koral. Ta p’esei nos ta trata nos awa sushi den instalashonnan pa purifiká awa. Un di e dos instalashonnan ta trahá kaba. Trùknan di awa ta hiba e awa for di bo berpùt òf tanki séptiko pa e instalashon pa purifikashon. Pa e di dos instalashon nos ta poniendo un sistema di pipa pa riol. I esei ta e motibu di tur e trabounan den Playa i a lo largu di kosta na Belnem i Hato. Tur dos di e instalashonnan pa purifikashon ta situá meimei di e isla kaminda tabata LVV, riba e kaminda pa Lagun. Pues pa ei tambe tin pipanan pa riol ta kore.
Mas trabou ku nunka
E trabou akí ta e proyekto infrastruktural di mas grandi ku a yega di ehekutá aki na Boneiru. Ta trata di 65.000 meter di pipa pa riol, 1.342 buraku, 570 baki pa rekohé, 4 stashon di pòmp i un instalashon pa purifiká awa. Gastunan total: $ 35 mion.
Ta di mes ku un proyekto di e embergadura akí ta okashoná hopi molèster. Ta p’esei gobièrnu i e kontratista ku ta ehekutá e trabou ta pidi bo komprenshon i koperashon. Pa medio di aviso, spòtnan na radio i un wèpsait, nos ta tene bo na altura di e trabounan.
Bon pa nos tur
Ku e proyekto akí nos ta balansá diferente interes. Kloaka ta nesesario pa salubridat di pueblo i pa salú di e refnan di koral. Turismo i ekonomia tambe ta sirbí ku e proyekto. Sin ref di koral salú turistanan no ta bini. I sin turismo nos isla tin poko futuro ekonómiko.
Finalmente ta bai pa bienestar di henter komunidat; di nos tur. Asina nos ta traha na desaroyo duradero di nos isla. Pasobra nos ke probechá awor i den futuro di loke nos isla tin di ofresé.”
