Djaluna último dos hóben di Bonaire Youth Outreach Foundation a risibí e grato notisia ku nan ta ganadó di e Adobe Youth Voices Aspire Audience Award. Ta trata aki di Jeanvier Janga i Meralney Bomba. E dos hóbennan aki a partisipá for di yüli 2012 na e proyekto di diseño i produkshon visual ku Bonaire Youth Outreach Foundation (BYOF) a organisá.
E proyekto en kestion finansiá pa e kompania gigante Adobe Corporation na Merka yama Adobe Youth Voices. Ta un proyekto ku ta trein hóbennan pa usa teknologia i media huntu ku nan kreatividat pa krea produkshonnan ku un propósito. E kompania Adobe ta pone software disponibel pa trein hóbennan i tambe ta trein e lidernan di organisashonnan rònt mundu pa krea produkshonnan kaminda hóbennan ta hala atenshon pa tópikonan di interes pa nan.
For di yüli 2011 BYOF a sa di reklutá 87 hóben pa partisipá na e proyekto di Adobe Youth Voices. E partisipantenan a sa usa nan kreatividat i imaginashon pa krea diferente diseño i tambe produkshonnan visual.
Na aprel último Adobe a organisá su kompetensia internashonal, ku tabata úniko den su estilo. Pa e kompetensia aki mas ku 800 produkshon for di kasi tur kontinente na mundu. For di e mas ku 800 produkshonnan entregá, solamente 160 a keda skohé komo semi-finalistanan. Tres di BYOF su produkshonnan a sa di sali den e 160 finalistanan. A trata aki di e proyektonan “Learn to Preserve” (un produkshon di Churmer Bomba i Jendric Janga), “Let it go” (un produkshon di Meralney Bomba) i “Change starts with oneself” (un produkshon di Jeanvier Janga).
‘Learn to preserve’ ta stimulá hóbennan Boneriano pa konservá nos medio ambiente, historia i kultura p’asina e futuro generashon di Boneiru tambe por disfrutá di nos dushi Boneiru. ‘Let it go’ ta enkurashá hóbennan pa pordoná hendenan ku por a heridá nan den pasado. Ku e produkshon aki Meralney ke konsientisá hóbennan ku renkor por stanka desaroyo di un hóben. Ku ‘Change starts with oneself’ Jeanvier Janga ke a konsientisá hóbennan ku e kambio ku hóbennan ke mira na mundu ta kuminsá serka kada persona individual.
For di e 160 semi-finalistanan, e kuerpo di hurado internashonal a skohe 24 finalista den 8 kategoria. Dos proyekto di BYOF ta den e 24 finalistanan aki. Ta trata aki di e proyektonan “Let it go” di Meralney Bomba i “CHange starts with oneself” di Jeanvier Janga. BYOF ke a felisitá tur e kuater hóbennan Boneriano ku a sa di no solamente di a traha un produkshon di kalidat, pero tambe a sa di hasi Boneiru konosí den eksterior ku nan produkshonnan. Boneiru por ta orguyoso ku e tin talento den e área di produkshon visual tambe.
