PHU, Partido Pro Hustisia i Union di Michiel Bijkerk a emiti su di 5 edishon di ‘E kaminda nos dilanti’, den kua e ta trese dilanti ku den kada ser humano e deseo pa sali for di kas i forma su propio famia ta un kos natural. Pero ta natural tambe pa e pareha hóben mantené laso estrecho ku nan mayornan. Independensia familiar no ta apsoluto. E deseo komo pueblo pa goberná su mes, tambe ta un kos natural. Pero tampoko no ta apsoluto.
“Estado Federal di Florida ta goberná su mes, pero na mesun momentu ta mantené union ku Estados Unidos. Deseo di paisnan Europeo ta pa forma union, entregando parti di nan independensia. Tin hopi motibu sano i legítimo pa esei. Di kon nos pueblo mester mester bira ‘independiente’? Pa prueba kiko?
Nashonalismo ta un ideologia falsu, pasobra e ta krea divishon entre hende. E ser humano ta preferá union, vooral ora divishon ta forma un peliger pa su bienestar. Independensia ta un responsabilidat grandi. Nada no ta imposibel, pero tur kos mester bini na su debido momentu. Hopi pais a drenta e barku di independensia mal prepará. Konsekuensia tabata korupshon, pobresa, guera sivil i hopi sufrimentu inesesario. Antia a skohe bon pa bai poko poko.
Di otro banda, un grado haltu di outonomia ta konsehabel, pasobra nos kultura ta diferente di esun Hulandes. No mihó, ni pió. Diferente. ‘Ons kent ons’, nan ta bisa na Hulandes. ‘All politics is local politics’, Merikano ta bisa. Lo no dura hopi pa Hulanda mes tambe komprondé esaki. E modelo federal a wòrdu kreá pa e situashon kaminda parti di un pais meresé mas outonomia pa motibunan práktiko i kultural. Ta mantené union, pero ta parti poder na un forma klaramente definí i bon balansá. Esensia ta ku tur poder ta bai na Boneiru, ménos un kantidat di tarea i responsabilidat limitá ku ta keda den man di Hulanda. Ta kasi igual ku e modelo di Statuut.
Importante ta, sin embargo, pa no bolbe kometé mesun eror ku antes. Zwartboek tras di zwartboek a demostrá ku un komunidat chikitu por kai den un moeras di korupshon mashá fásil. For di 1954 Hulanda mester a saneá nos finansa públiko tres biaha (1). Ministerio Públiko no tabata efektivo komo forsa korektivo (2). Malgobernashon i nòmbramentu polítiko di amtenar tabata e norma hopi aña largu (3).
Ta p’esei PHU ta promové e modelo di Estado Federal, pasobra nos meresé mas outonomia. Hopi mas outonomia. Pero pa evitá ripitishon di e mesun erornan di pasado, nos ta kere ku mester tin supervishon finansiero (1), hudisial (2) i atministrativo (3). Kon e supervishon aki mester funshoná i kua órgano mester wòrdu enkargá kuné ta preguntanan ku nos ta laga habrí. Supervishon por wòrdu yená diferente manera, basta e ta efektivo i tin kredibilidat.” Te asina leu e komunikado emití di parti PHU.
