Gerensia di WEB N.V. den un komunikado ta bolbe duna informashon riba interupshon di distribushon di koriente djabièrnè último. Algu ku sin duda remarkablemente a bin ta pasa ku frekuensia riba Boneiru.
Djabièrnè tardi pa 25 minüt pa 3’or atardi, a surgi un korto sirkuito na un poste di altá tenshon den Nikiboko. Esaki a trese kuné ku diferente bario manera Nikiboko Tera Cora, Amboina i un parti di tereno industrial (industrie terrein) a keda sin koriente. Mesora e personal di WEB N.V. a kuminsá ku inspekshon di e red ku tabata for di servisio. Despues di basta ratu a bin lokalisá orígen di e problema di interupshon di koriente. Despues di a solushoná e problema a bolbe kuminsá ku e proseso pa duna e diferente bario nan koriente bek. Tabata pa mas o ménos 5 minüt pa 7’or ku tur e bario nan ya menshoná a haña koriente bek.
WEB N.V. ta pidi komprenshon pa e situashon ku a presentá djabièrnè atardi.
