Djaweps i djabièrnè 26 i 27 di aprel benidero, ABVO ta tene su kongreso statutario. Esaki lo tuma lugá na sede di ABVO na Brievengat Kòrsou.
E programa ta kuminsá djaweps ku inskripshon di delegadonan sigui pa himnonan i palabra di presidente sr. Wendy Calmes. Despues lo eligí i instalá komishon kredensial sigui ku relato di e komishon, i elekshon i instalashon di mesa di direktiva di e kongreso. Despues di un pousa kòrtiko lo aprobá agènda i notulonan di konseho Statutario ku a ser tene dia 24 i 25 di novèmber aña pasa i relato di direktiva di ABVO, i lo terminá e dia ku un presentashon.
Djabièrnè lo atendé relato di komishon di disiplina, komishon di fondo, i di sekretario di finansa. Lo bai tin tambe elekshonnan i instalashon di e siguiente komishonnan elekshon, fondo, disiplina. Resúmen di desishonnan di konseho. E kongreso lo tèrminá ku turno liber i ku un aktividat sosial.
ABVO sekshon Boneiru lo partisipá ku 7 delegado na e kongreso den persona di Luty Balentin, Gwendell Goeloe, Ensley Emers i Betty Martis miembronan di direktiva di ABVO Boneiru huntu ku e miembronan Judell Emerenciana, Marklin Eustachia i Jairo Cornelis.
