Aktualmente por tuma nota ku chinesnan ta ampliando nan hala i akapará mayoria supermerkado riba e isla di Boneiru. Esaki nos por konkluí, despues ku resientemente a yega na nos konosementu ku chinesnan a kumpra dos supermerkado mas riba e isla. Ta trata aki di e establesimentu Tusnara den Rincon i tambe Cultimara ku na fin di 2011 a konfrontá problema ku fayo den kumplimentu ku impuesto i ku komo konsekuensia ku e supermerkado aki tambe a keda sera.
E supermerkado Cultimara a keda kumpra pa e konosido Wing Cheung, ku ya tin un supermerkado den bario di Antriol. Su tata a kuminsá ku un bar restorant bou di e nomber Pekin i tabata algun aña pasá ku Wing Cheung a lanta un supermerkado pega ku e resorant Pekin i a yam’é Wing Cheung. Poko poko e supermerkado ku a kuminsá ku e fenomeno pa keda habri te 8’or anochi i tambe riba djadumingu a kuminsá ekspande i a sigui ekspandé, risibiendo mas klientela.
Awor ku a habri e posibilidat pa por a kumpra Cultimara, unbes Wing Cheung a mira e posibilidat i a bai p’é. Segun nos informashonnan, aktualmente Wing Cheung ta trahando riba reklutashon di empleadonan, despues ku ya por a tuma nota di algun kara hoben di su paisanonan chines a kuminsá praktiká dominá e kaheranan dio Pekin, ya ku nan lo bai okupá e posishonnan aki den Cultimara probablemente.
E chines ku a kumpra Tusnara na Rincon, tabata propietario di e snack riba e karetera pa Lagoen, den Antriol Pariba. Ku esakinan por menshoná ku fuera di Pekin, Tusnara i tambe Cultimara ku lo keda habrí den luna di mart proksimo, tin otro supermerkadonan chines, kualnan ta Caribe Supermarket i un otro supermerkado chines riba Kaya Industria, Sunshine Supermarket, unu den Rincon, tambe Sunrise Mini market i unu riba Kaya Nikiboko Nort, unu na altura di e planta di Web N.V. i si nos no ta ekiboká unu den Nort’i Saliña. Ku esaki sigur nan lo por kombiná ku otro i buska merkansia huntu direktamente, pa asina suavisá e preis di konsumo aki riba Boneiru. Esaki ta ku si nan bai traha ku otro, ya ku den tur nashon i entre e chinesnan tambe tin ku no ta atendé ku otro.
