Djabièrnè 25 de novèmber, Instruktor di sambuyamentu di VIP, Bas Tol a yama Stinapa pa informá ku e la haña un turtuga bèrdè morto den kanal di Cai. Stinapa inmediatamente a pasa e informashon na STCB dor di e liña telefóniko di emergensia i e personal di STCB a bai serka di Bas Toll pa buska e turtuga morto i hasi e averiguashon konserní.
Solamente e kaska bashí tabata t’ei mustrando señalnan klaro di poachmentu sigun Mabel Nava, gerente di STCB esaki ta mustra ku e turtuga a wòrdu kòrtá pa konsumo di hende.
Turtuganan di laman ta protehá den nos lei riba e legislashon “Eilandsverordening tot Bescherming van de Zeeschildpadden en Kreeften.”(den artíkulo 14, punto 2, ta prohibí pa mata, kaptura òf tin poseshon di turtuganan di laman) E pena pa violashon di e lei aki ta inkluí un multa òf enkarselamentu. Esaki ta debí ku e turtuganan blanku ta den peliger di ekstinshon rònt di mundu i su numbernan ta sigui disminuí te ainda. E poblashonnan di turtuganan a 
disminuí notablemente debí na kosechanan ilegal di su webunan i e turtuganan muhé riba e playanan na unda nan ta pone su nèshinan i e kantidat haltu di kaptura aksidental dor di piskamentu plùs e destrukshon di su áreanan di pone nèshi ta pone hopi preshon riba e poblashonnan di tur espesienan di turtuganan di laman rònt mundu.
Sea Turtle Conservation Bonaire ta traha riba protekshon di turtuganan di laman na Boneiru for di aña 1991 para garantisá e protekshon i rekuperashon di e poblashon di turtuganan di laman na Boneiru i riba su áreanan di bida. Esaki ta un evento masha alarmante pa nos informá komunidat i kualkier informashon ku nos por haña nos ta gradesí i un hende por yama nos na nos liña di emergensia 7800433, Stinapa òf na Polis. E informashon risibí lo wòrdu trata di manera konfidensial.
