Djabièrnè awor dia 2 di desèmber pa 8’or di anochi lo bai tin un kaminata yama : “Walk for Art and Sport”. Kas di Arte i softballteam Energizer ta organisá esaki. Meta pa kual ta hasi esaki ta pa rekoudá fondo pa arte espesial pa un komedia pa mucha ku mester bai duna algun presentashon na skolnan i fondo pa e softballteam.
E kaminata lo sali for di seru largu di e plenchi dilanti di e krus, pasa rònt Seru Largu baha pasa Nort’i Saliña sigui Kaya Inka, Kaya Amsterdam, rotònde, bulevar Gobernador Nicolaas Debrot, kita man drechi nèt dilanti Bistro de Paris i subi malekon pa terminá asina ei na Kas di Arte. E Kontribushon pa “walk for Art and Sport “ ta solamente $5.00 pa persona. Kumprando bo karchi bo ta haya un flanèl i na yegada na Kas di Arte bo a risibí un hamburger.
Koperashon lo wòrdu pidi na bankonan, komersio i tur hende ku ke koperá dor di kumpra karchi pa nan trahadónan pa un bon kousa. Por yama 795 5545 òf pasa na Kas di Arte i miembronan di e softballteam pa karchi i flanèl. E dos organisashonnan aki a djòin otro pasobra moveshon tambe ta bon pa salu.
