Apertura radio ‘Energia 97.1 FM’ lo kulminá djasabra awor ku DREAMS Live

Durante un konferensha di prensa den oranan di atardi ku a kulminá tambe ku apertura di e emisora ‘Energia 97.1 FM’ situá den e edifisio di CBA den Kaya Grandi. Tabata sra. Esmeralda Huerta, direktor di e emisora a splika ku basta tempu kaba nan a wòrdu aserka pa tuma e radio i pa atendé kuné. Pa basta pida pida kos no a hasi mas promé, pero awor ta kla pa esaki.

E emisora ta konsistí di Pastor Senchi i esposa ku ta enkargá diariamente ku un programa di motivashon spiritual, yama ‘Bida’ di 6’or pa 7’or di mainta. Tambe DJ LS-Base, meskos DJ Cacique kendenan ta forma parti di e staf di e radio i tres hóben di Bonaire Youth Outreach Foundation ku ta enkargá tambe ku un programashon, tambe yùfrou Ketty i sr. Donny Wout kende ta forma parti di e staf igual ku sra. Blancaflor Nicolaas.

Segun sra. Huerta, e ta bini di un famia ku tin dos ruman den radio divishon na Kòrsou. Pues e ta kalkulá ku esaki ta den nan sanger i despues ku el a keda ofresé e oportunidat el a aseptá e reto. Radio Energia 97.1 FM lo bini ku un programashon hopi varia i e ta sigur ku esaki lo bai ta na agrado di e pueblo di Boneiru. E programashon lo basa riba informashon i sin ke divulgá nada ainda, pero lo bini ku hopi sorpresa tambe. Tur lo keda divulgá na debido tempu. Lema di e emisora nobo aki lo ta; Radio Energia 97.1 FM, e radio di mi di bo di nos, mandando energia positivo pa henter Boneiru.

E apertura di e emisora ofisialmente a tuma lugá despues di e konferensha di prensa, ku pastor Andres bendishoná e lokalidat i djasabra awor lo tin e parti apertura pa pueblo riba e plasa dilanti di e ofisina di CBA. Insel Air ku ta e patrosinador di e apertura aki, a sòru pa brinda e pueblo di Boneiru e banda di aktualidat di Kòrsou, DREAMS, ku ta bin deleitá e pueblo di Boneiru ku nan músikanan. Un i tur ta keda kordialmente invitá pa zeta nan lomba i baha kaya. Kos lo bai kuminsa kuartu pa 8’or anochi.

About admin